Монгол Улсын Ерөнхийлөгчийн ивээл дор зохион байгуулагдаж байгаа “Гадаадад байгаа монгол мэргэжилтнүүдийн зуны лекц-2010” өнөөдөр эхэллээ. Лекцийн арга хэмжээнд АНУ-ын Мизурийн их сургуулийн Шинжлэх ухаан, сургалтын технологийн сургуулийн доктор Я.Борчулуун “Онлайн сургалт” сэдвээр илтгэл тавив.
Финландын Аабо Академи Их Сургуулийн доктор Д.Цэрэн-Онолт “Компьютерийн ухааны судалгааны нэгэн чиглэл: натурал тооцоолол” сэдвээр, Хэл шинжлэлийн ухааны доктор, АНУ-ын Конгрессийн номын сангийн ажилтан М.Саруул-Эрдэнэ “Мэдээллийн технологийн хэл шинжлэлийн асуудлууд” сэдвээр, АНУ-ын “IBM”-ийн мэргэшсэн мэргэжилтэн, АНУ дахь Монголын худалдааны танхимын Ерөнхийлөгч Э.Жагдагдорж “Бизнесийн болон харилцааны соёл”, “Барууны боловсролын гол үзэл санаа, тогтолцоо” сэдвүүдээр бүтэн өдрийн лекц уншина.
Лекцийн онцлог нь гадаадад амжилттай ажиллаж амьдарч өндөр боловсрол эзэмшсэн чадварлаг иргэдийнхээ эх орноо хөгжүүлэх үзэл санаа, хүсэл зорилгод дэм өгч байгаа юм. Монгол Улсын Ерөнхийлөгчийн зүгээс тэдний сайн санал санаачилгыг дэмжих зорилготой. Анх удаагаа зохион байгуулагдаж байгаа лекцийн үндсэн сэдэв нь мэдээллийн технологи, ноу хау-д чиглэж байна. Энэ нь Монгол Улсын мэдлэгт суурилсан хөгжлийг бүтээхэд үнэ цэнэтэй алхам гэж үзэж байгаа юм билээ.
Лекцийн үеэр гадаадад эх орныхоо нэрийг өндөрт өргөн яваа зарим иргэнээ Монгол Улсын Ерөнхийлөгч, Их Монгол Улс байгуулагдсаны 804, Ардын хувьсгалын 89 жилийн ойг тохиолдуулан шагнаж урамшуулсныг гардуулав.
“All state Insurance”корпорацийн Ахлах зөвлөх Ширчингийн Баатарыг “Алтан гадас” одонгоор, АНУ дахь Монгол соёлын төвийн тэргүүн, хэл судлалын ухааны доктор М.Саруул-Эрдэнийг “Хөдөлмөрийн хүндэт” медалиар тус тус шагнажээ.
Тус лекцийн нээлтэд Монгол Улсын Ерөнхийлөгчийн Зөвлөх А.Ганбаатар оролцож байна. Тэрбээр гадаадад байгаа Монголчуудынхаа тухай Ерөнхийлөгчийн баримталж байгаа бодлогыг танилцууллаа.
Монгол Улсын Ерөнхийлөгч Ц.Элбэгдорж гадаадад ажиллаж амьдарч, сурч боловсорч байгаа монголчуудынхаа эх орноо хөгжүүлэх гэсэн санал санаачилга бүрийг дэмжин ажиллахаар мөрийн хөтөлбөртөө тусгасан байдаг.
Мөрийн хөтөлбөрийнхөө дагуу гадаадад амьдарч байгаа Монголчуудынхаа эрх ашгийг хамгаалах, тэднийг эх орондоо ирж ажиллаж амьдрах, бүтээн байгуулах үйлсэд оролцох эрх зүйн орчин, эдийн засгийн дэмжлэгийг бий болгох зорилгоор “Зөгийн үүр” төслийг Ерөнхийлөгч хүчтэй дэмжиж байгаа юм байна.
