Кино урлагийн ашиг орлогын талаар мэдээллэдэг Box Office chart-н энэ долоо хоногийн тэргүүлэгчдийг тодрууллаа.
Дэлгэцэнд гарснаасаа хойш 3 долоо хоногийн дотор "Toy Story 3" хүүхэлдэйн кино нь өнгөрсөн долоо хоногийн байдлаар 62 сая америк долларын ашиг олсон бөгөөд Box Office-н 2 дугаар байранд явж байна.
Pixar-н энэхүү шинэ бүтээл нь нийт 351 сая америк долларын ашгийг цуглуулаад байгаа нь хүүхэлдэйн киноны түүхэнд байгаагүй амжилт гэнэ.
Америкт өөрийн ноёрхлоо тогтоогоод буй "Inception" киноны нийт худалдааны төвүүдээс олсон ашиг нь 84 сая долларт хүрчээ. Шинжлэх ухааны уран зөгнөлт энэхүү кино нь Японд 8.9 сая, Францад 8.1 сая, Оросод 6.7 сая, Австралид 6.4 сая америк долларыг тус тус олсноороо №1-т бичигдэж байна.
Мөн саяхан нээлтээ хийгээд удаагүй байгаа найруулагч Phillipp Noyce-н бүтээл гол дүрд нь Angelina Jolie тоглосон "Salt" кино нь долоо хоногийн дотор 5.1 сая америк долларын ашиг олоод амжжээ. Тус кино нь хүйтэн дайны талаар өгүүлэх бөгөөд гол дүрийн жүжигчин бүсгүй маань CIA буюу Тагнуулын төв газрын нууц ажилтны дүрд тоглосон юм байна.
Өнгөрсөн долоо хоногийн гадаад улсуудад хамгийн их ашиг орлого цуглуулсан бүтээлээр Shrek хүүхэлдэйн киноны шинэ анги болох "Shrek Forever After" 33 сая америк долларын ашгаараа тэргүүлжээ. Тус хүүхэлдэйн кино нь 5 сарын 20-нд нээлтээ хийснээсээ хойш нийтдээ 361 сая америк долларын ашиг олоод байгаа юм.
